Намын Үндсэн дүрэм, журамд тэгш байдал, үл ялгаварлах зарчмуудыг намын шийдвэр гаргах болон дотоод үйл ажиллагааны зарчим болгож тусгана. Улс төрийн шийдвэр гаргах түвшинд хүйсийн тэнцвэртэй байдлыг хангах талаар хууль тогтоомжид орсон өөрчлөлт, шинэчлэлийн зарчим, хэм хэмжээ, зохицуулалтыг Намын Үндсэн дүрэм, журамд тусгаж, намын удирдах байгууллага, удирдлагын бүх түвшинд баримталж ажиллана.

Жендэрийн бодлогын талаар дэлхий нийтээр баримталж буй бодлого, чиг хандлага, нэг хүйс давамгайлсан улс төр, геополитикийн бодлогын үр дагавар, гадаад, дотоод нөхцөл байдал, улс орны улс төр, нийгэм, эдийн засаг, хүний эрх, аюулгүй байдлын түвшин, тэдгээрт нөлөөлөх хүчин зүйлээс хамаарсан уян хатан бодлого, үйл ажиллагааг хэрэгжүүлнэ. Ардчилсан намаас 2024-2030 онуудад баримтлах Жендэрийн бодлогыг хэрэгжүүлэх стратегийг батлан хэрэгжүүлнэ.

Бүх шатны төрийн сонгуульд Ардчилсан намаас нэр дэвшүүлэхэд Сонгуулийн тухай хууль тогтоомжид заасан квотыг доод хязгаар гэдгийг ухамсарлан, нийт нэр дэвшигчдийн 40-өөс дээш хувьд эмэгтэйчүүдийг нэр дэвшүүлэх эсвэл төрийн сонгуульд ялалт байгуулсан тохиолдолд нийт улс төрийн томилгооны 40-өөс дээш хувьд эмэгтэйчүүдийг томилох бодлого баримтална.

Намын төлөөллийн төв байгууллага, гүйцэтгэх төв байгууллага болон хяналтын байгууллагын бүрэлдэхүүнд аль нэг хүйсийн төлөөлөл 40 хувиас доошгүй байх Улс төрийн намын тухай хуульд заасан шаардлагыг дүрэмд журамд тусгах, дагаж мөрдөх, энэ тухай хуульд заасан тайланг зохих байгууллагад хүргүүлнэ. Намын төв болон орон нутгийн удирдах түвшин, дотоод үйл ажиллагаанд жендэрийн эрх тэгш байдлыг хангах бодлого, дүрэм журмын хэрэгжилтэд намын Үндсэн дүрмийн хороо, Хяналтын зөвлөл хариуцах асуудлын хүрээнд хяналт тавих зохицуулалтыг хийнэ.

Бүх шатны сонгуульд дэвшүүлэх Ардчилсан намын мөрийн хөтөлбөрт жендэрийн эрх тэгш байдлыг хангах бодлогын зорилтуудыг тусгана. Нам жендэрийн хариуцлагатай мөрийн хөтөлбөр боловсруулахын төлөө хүчин чармайлт гаргаж ажиллана.

Улс төрийн санхүүжилтийг нээлттэй, ил тод болгох, сонгуулийн зардлыг бууруулах, эмэгтэйчүүдийн улс төрийн оролцоонд тулгамддаг санхүүгийн дутмаг байдалтай холбоотой саад бэрхшээлүүдийг ухамсарлан гарааны тэгш нөхцөлийг бүрдүүлэх, эмэгтэйчүүдийн санхүүгийн ачааллыг хөнгөвчлөх санхүүжилтийн арга, механизмуудыг хэрэглэнэ. Улс төрийн сонгуулийн үед намаас нэр дэвшигч эмэгтэйчүүдийн кампанит ажилд санхүүгийн туслалцаа үзүүлэх “Дундын сан” байгуулахыг дэмжиж, хандивлагчдын сүлжээ бий болгох ажлыг зохион байгуулахад хамтран ажиллана.

Намын дотоод дүрэм, журамд аливаа жендэрт суурилсан ялгаварлал гадуурхал, дарамт, хүчирхийлэл, бэлгийн дарамтаас урьдчилан сэргийлэх бодлогыг тусгаж, гомдол гаргах болон талуудын эрхийг хамгаалсан хянан шийдвэрлэх тогтолцоог бий болгоно.

Намын арга хэмжээ, хурал цуглаан, олон нийтэд хандсан үйл ажиллагааны бүрэлдэхүүн, зохион байгуулалтад жендэрийн тэгш байдлыг хангах, аливаа намын арга хэмжээг гишүүдийн ажил, амьдралын тэнцвэрт нийцсэн арга хэлбэрээр зохион байгуулах, мөн хэвшмэл ойлголт, хандлагыг халах зорилгоор тодорхой зохицуулалтын арга хэмжээ авах бөгөөд энэ талаар Зөвлөмж гаргаж шат шатны намын үйл ажиллагаанд мөрдүүлнэ.

Улс төрийн ур чадвар эзэмших, туршлага хуримтлуулах боломжийг нэмэгдүүлэх зорилгоор бүх шатны намын эмэгтэй гишүүдэд чиглэсэн зорилтот хөтөлбөр, сургалтын үйл ажиллагааг тасралтгүй явуулна.

Ардчилсан эмэгтэйчүүдийн холбоо нь намын бодлогод жендэрийн үзэл баримтлалыг тусгах, намын гишүүн эмэгтэйчүүдийн дуу хоолойг илэрхийлэх, төлөөлөх эрх бүхий намын дэргэдэх байгууллага мөн бөгөөд нам Ардчилсан эмэгтэйчүүдийн холбооны үйл ажиллагааг бүх талаар дэмжин сонгуульд нэр дэвшүүлэх, мөрийн хөтөлбөр, бодлого дэвшүүлэхэд харилцан зөвшилцөнө. Эмэгтэйчүүдийн улс төрийн оролцоог дэмжих, сургаж бэлтгэхэд зориулсан төсвөөс намд олгох санхүүжилтийг Ардчилсан эмэгтэйчүүдийн холбооны үйл ажиллагаагаар дамжуулан зохих ёсоор зарцуулна.

Ардчилсан нам нь жендэрийн тэгш байдлыг хангах бодлого тодорхойлж, хөтөлбөр боловсруулахдаа иргэд, олон нийтийн санаа бодлыг тогтмол сонсох ба иргэний нийгэм, ТББ-уудтай хамтын ажиллагааг өргөжүүлэн ажиллана.